【吉野家大戰】當眾換片冇品 港女喪插有因
一段「吉野家大戰！港女VS強國人！」嘅短片喺網上瘋傳，起因係兩位疑似內地男子喺餐廳入面當眾幫小朋友換片，而引發罵戰，差人到場證實報案男子有香港身份證，因為愛女心切先當眾換片，雙方同意和解。。
件事喺噚日發生，地點喺元朗大棠嘅吉野家，一開始就見到兩位男子為一個小朋友著褲，拍片嘅小姐就話「唔知你細路哥咩事，總知大家食緊飯，你無理由咁做嘅」、「唔好以為你哋唔係香港人就大晒呀，呢度喺香港呀」，仲話廁所就喺附近。
點知對方竟然用粗口回應「關你X事呀！」好彩，拍片位小姐無被拋窒，堅持自己嘅信念，繼續力數佢哋「乜嘢都要我哋香港人忍耐嘛，周地瀨屎瀨尿都要我哋忍耐嘛」、「這裡是香港呀，廣東省無廁所㗎？」、「教個細路都教唔好，學咩人做中國人？」兩位男子對指控無力招架，只反問拍片對事情有無幫助，仲爆出一句「垃圾」。
片段上載短短1小時，已有2千多人讚好，大部份都稱讚港女勇敢、夠膽色，表現一流。當然亦有人覺得拍片小姐態度有問題，引起咗另一場網上罵戰。（蘋果日報）
吉野家大戰 原文: 【短片】【吉野家大戰】當眾換片冇品 港女喪插有因
